Axad, (Caaqil News), Ciidamada difaaca Puntland ayaa qoraal kooban ku sheegay in ay ka qabsadeen kooxda Argagixisada Daacish saldhigga Warisoor oo ku dhow deegaanka Turmasaale.
Qoraalka oo ka soo baxay Hawlgalka Ciribtirka Kooxaha Argagixisada ah ee Puntland ayaa lagu xaqiijiyay in ciidanku ay ka saareen maleeshiyada Daacish saldhiggoodii Warisoor ee ku yaalla nawaaxiga buuraha Calmiskaad, gobolka Bari.
"Ciidanku waxay la wareegeen taliskii ay kooxda Argagixisada Daacish ku lahayd deegaanka Warisoor, agagaarka Turmasaale ee Calmiskaad," ayaa lagu yiri qoraalka ka soo baxay Hawlgalka La-dagaallanka Argagixisada ee Puntland.
Sidoo kale, ciidamada difaaca Puntland ayaa maalmo ka hor kooxda Daacish ka qabsaday taliskii weynaa ee deegaanka Turmasaale, kaasoo la rumeysan yahay inuu sannadihii dambe xarun u ahaa hoggaamiyaha kooxdaas, Cabdiqaadir Muumin.