Talaado,14 January 2025 (caaqil News ), Wafdi heer sare ah oo uu hoggaaminayo Mudane Sultan Abdulrahman Al-Marshad oo ah Agaasimaha Maamulka Sanduuqa Horumarinta Dhaqaalaha Sacuudiga (SEDF) ayaa maanta soo gaaray magaalada Muqdisho, kadib casuumaad rasmi ah oo uu ka helay Wasiirka Maaliyadda Soomaaliya Mudane. Biixi Iimaan Cige.
Booqashadan ayaa astaan weyn u ah xoojinta iskaashiga dhaqaale ee Soomaaliya iyo Sacuudiga. Mudane Al-Marshad iyo wafdigiisa ayaa inta ay joogaan waxa ay kulamo muhiim ah la qaadan doonaan madaxda sare ee dowladda Soomaaliya oo ay kala hadli doonaan fursadaha maalgashi ee horumarineed ee dalka ka jira.
Wafdiga ayaa markii ay ka soo degeen garoonka diyaaradaha Aadan Cadde waxaa si diiran ugu soo dhaweeyay Wasiirka Maaliyadda Biixi Iimaan Cige oo ay wehliyaan Wasiirka Tamarta iyo Biyaha Soomaaliya C/llaahi Bidhaan Warsame iyo Safiirka Boqortooyada Sacuudiga Mudane Axmed Bin Maxamed Al Mawliid. Mas’uuliyiinta Soomaaliya ayaa warbixin ka dhageystay xaaladda dhaqaale ee dalka, waxaana ay faah faahin ka bixiyeen ajandayaasha looga hadlayo arrimaha Soomaaliya.
Wasiir Cige waxa uu aad ugu mahad-naqay Mudane Al-Marshad soo dhawayntiisa, waxaanu yidhi.
“Sharaf bay ii tahay in aan Muqdisho ku soo dhaweeyo Suldaan Al-Marshad iyo kooxdiisa booqashadan taariikhiga ah. Inta ay joogaan waxaan gali doonaa wadahadalo muhiim ah si aan u sahamino fursadaha maalgashi ee Soomaaliya iyo in aan ku heshiino istaraatiijiyad aan ku horumarinayno dhaqaalaheena”.
Sanduuqa Horumarinta Dhaqaalaha Sacuudiga ayaa ahaa saaxiibka muhiimka ah ee dowladda Soomaaliya, isagoo door muhiim ah ka qaatay barnaamijka dib u habeynta dhaqaalaha dalka. Dib-u-habayntan ayaa si weyn wax uga tartay guulihii ay Soomaaliya ka gaartay guul-darradii deymaha lagu lahaa, taasoo u gogol xaaraysay xasilloonida iyo kobaca maaliyadeed ee la xoojiyay.
Booqashadan ayaa la filayaa in ay sii adkeyso xiriirka laba geesoodka ah iyo in ay abuurto waddooyin saameyn ku leh mashaariicda horumarineed ee looga gol leeyahay in lagu kobciyo dhaqaalaha Soomaaliya iyo horumarinta hab-nololeedka muwaadiniinteeda.