● Ciidamada difaaca Puntland ayaa hawlgal qorshaysan ka sameeyay buuraleyda Calmiskaad, halkaas oo ay ku guuleysteen in ay burburiyaan keydkii guud ee raashinka iyo xaruntii caafimaadka ee kooxda Daacish.
Saraakiisha hoggaaminaya hawlgalka ciribtirka kooxaha argagixisada ee Puntland ayaa sheegay in ciidamada ay ku guuleysteen burburinta goobahan muhiimka ah, taas oo saameyn weyn ku yeelatay awoodda kooxda. Sidoo kale, waxay xaqiijiyeen in hawlgalkan lagu qabtay taliskii guud ee tababarada maleeshiyaadka Daacish, isla markaana lagu dilay xubno ka tirsan kooxda oo dhammaantood ajaanib ah.
Saraakiishu waxay intaas ku dareen in kooxda Daacish ay hadda ku go'doonsan yihiin aag yar oo ay dhinacyada kaga hareereysan yihiin ciidamada dowladda, si loo soo afjaro gebi ahaanba jiritaankooda aaggaas. Hawlgalku wuxuu qayb ka yahay dadaallada joogtada ah ee lagu xoojinayo amniga Puntland.