 |
| 19-April-2025 |
Warka maanta (Caaqil News) - Ciidamada ammaanka Puntland ayaa shalay qabtay howlgal ballaaran oo qorsheysan oo ka dhacay dooxada Miraale ee gobolka Bari halkaas oo ay muddo dheer ku dhuumaaleysanayeen dagaalyahanno ka tirsan kooxda Daacish Howlgalkan oo qeyb ka ah wejiga saddexaad ee dagaalka lagu ciribtirayo kooxaha argagixisada ee Puntland ayaa lagu sheegay inuu ahaa mid si gaar ah loo qorsheeyay iyadoo ujeedkiisuna ahaa in lagu sifeeyo deegaanadaas loogana hortago khataraha ay kooxaha xagjirka ah ku hayaan shacabka iyo xasilloonida guud ee gobolka
War rasmi ah oo kasoo baxay wasaaradda amniga Puntland ayaa lagu sheegay in ciidamada ay guulo wax ku ool ah ka gaareen howlgalkaas iyagoo burburiyay fadhiisimo muhiim ah oo kooxda Daacish ay ku lahayd dooxada Miraale Ciidamada ayaa la sheegay inay si buuxda u sifeyn ku sameeyeen godad qalcado iyo saldhigyo ciidan oo ay kooxdu ka dhisatay halkaas kuwaas oo muddo sanado ah ay kaga soo abaabuli jireen weerarro qarsoodi ah iyo dhaqdhaqaaqyo argagixiso oo ay ku beegsanayeen shacabka iyo ciidamada amniga ee Puntland
Howlgalka oo uu hormuud u ahaa taliyaha ciidamada Daraawiishta Puntland ayaa dhacay kadib markii ciidamada Puntland ay heleen xog sirdoon oo muujineysa goobaha ay ku dhuumaaleysanayaan xubnaha Daacish Ciidamada ayaa la kulmay iska caabin xoog leh oo uga timid dagaalyahannada kooxda kuwaas oo adeegsanayay hub culus iyo qoryaha darandooriga u dhaca iyagoo sidoo kale ka faa’iideysanayay juqraafi ahaan buuraha dhaadheer ee ku hareereysan dooxada Miraale
Dagaalka oo socday ku dhowaad 12 saacadood ayaa sababay dhimashada iyo dhaawaca tiro ka tirsan labada dhinac Sida ay wararku sheegayaan dhowr askari oo katirsan ciidamada Puntland ayaa ku dhintay howlgalka halka tiro kalena ay dhaawacyo kasoo gaareen Sidoo kale dhinaca kooxda Daacish ayaa la rumeysan yahay in khasaare xooggan loo geystay inkastoo aan si rasmi ah loo caddeyn tirada dhimashada ee kooxda gaaray
Taliyaha ciidamada Puntland ayaa sheegay in dagaalka uu ahaa mid adag balse ciidamada ay guulo la taaban karo ka gaareen isagoo xusay in ay burburiyeen dhammaan godadkii iyo saldhigyadii kooxda Wuxuu intaas ku daray in howlgalka uu qeyb ka yahay qorshe ballaaran oo lagu sifeynayo guud ahaan buuraha gobolka Bari gaar ahaan meelaha ay kooxaha argagixisada ku dhuumaaleysanayaan
Gobolka Bari gaar ahaan buuraha Golis iyo dooxooyinka ku yaal agagaarka magaalada Boosaaso ayaa sanadihii la soo dhaafay noqday meel ay ku dhuumaaleysanayaan kooxaha argagixisada ee Daacish iyo AlShabaab Kooxahaasi ayaa halkaas ka abaabula weerarro qorsheysan oo lagu beegsado ciidamada ammaanka iyo dadka shacabka ah Daacish ayaa si gaar ah ugu xooggan deegaankaas tan iyo sanadkii 2015 markaas oo ay dagaalyahanno ka goostay AlShabaab aasaaseen garab cusub oo Daacish taageersan
Puntland ayaa sanadihii la soo dhaafay qaadayay howlgallo joogto ah oo ka dhan ah kooxahaasi iyadoo dhowr jeer lagu dilay hoggaamiyeyaal sar sare oo ka tirsanaa Daacish Si kastaba ha ahaatee deegaanka buuraleyda ah ee aan si fudud loo gaari karin ayaa caqabad weyn ku noqotay ciidamada taas oo sababtay in kooxda ay marar badan dib usoo celiso abaabulkooda
Maamulka Puntland ayaa sheegay in howlgallada noocan oo kale ah ay sii socon doonaan ilaa laga suuliyo kooxaha argagixisada ee ku dhuumaaleysanaya buuraha gobolka Bari Dowladda hoose iyo taliska ciidamada ayaa ugu baaqay shacabka deegaanka inay la shaqeeyaan ciidamada ammaanka ayna soo sheegaan dhaq dhaqaaqyada lagu tuhmo in ay xiriir la leeyihiin kooxaha xagjirka ah
Puntland waxay horey u abuurtay cutubyo khaas ah oo loo tababaray la dagaallanka argagixisada kuwaas oo lagu qalabeeyay hub casri ah iyo tababaro dhanka dagaallada buuraha ah Taliska ciidamada ayaa sheegay in qorshuhu yahay in guud ahaan gobolka Bari laga saaro kooxaha Daacish iyo AlShabaab si loo xaqiijiyo nabadgelyo waarta oo deegaannadaas ka hanaqaada
Howlgalka shalay dhacay ayaa sidoo kale saameyn xooggan ku yeeshay shacabka deegaanka kuwaas oo bilaabay inay ka barakacaan guryahooda si ay uga fogaadaan khatarta dagaalka Wararka laga helayo deegaanka ayaa sheegaya in dadka deegaanka ay maqleen dhawaqa rasaasta culus iyo madaafiicda taas oo cabsi gelisay qoysaska ku nool dooxada iyo deegaannada ku hareereysan
Hay’adaha bulshada ayaa ka walaacsan xaaladda bani’aadantinimo ee ka dhalan karta howlgalka iyo saameynta uu ku yeelan karo nolosha dadka deegaanka Waxaa jirta cabsi laga qabo in dadka deegaanka ay waayaan adeegyada aas aaska ah sida caafimaadka biyaha iyo cuntooyinka haddii xaaladda amni ay muddo sii cakirnaato
Howlgalkan ballaaran ee ka dhacay dooxada Miraale ayaa lagu tilmaamay mid ka mid ah hawlgalladii ugu waaweynaa ee Puntland ka fuliso gobolka Bari tan iyo bilowgii sanadkan Taliska ciidamada Puntland iyo maamulka gobolka Bari ayaa sheegay inay ku faraxsan yihiin natiijada howlgalka isla markaana ay sii wadi doonaan dagaalka ka dhanka ah kooxaha argagixisada iyagoo shacabka ugu baaqay inay ciidamada la shaqeeyaan
Sidoo kale Puntland ayaa qorsheyneysa inay xoojiso wada shaqeynta kala dhaxeysa dowladda federaalka iyo saaxiibada caalamiga ah ee taageera la dagaallanka argagixisada si loo helo agab dheeraad ah iyo taageero farsamo oo lagu xaqiijinayo amniga gobolka
Ugu dambeyn maamulka Puntland ayaa balan qaaday in maalmaha soo socda ay faahfaahin dheeraad ah kasoo saari doonaan khasaaraha rasmiga ah ee howlgalka tirada dagaalyahannada la dilay iyo hubka ay ciidamada gacanta ku dhigeen Puntland waxay ballan qaaday inay sii wadi doonto hawlgallada lagu xoreynayo dhammaan goobaha ay kooxaha argagixisada kaga dhuumaaleysanayaan gobolka Bari si shacabka looga dulqaado cabsi iyo xasilooni darro
0 Comments