 |
| 2-April-2025 |
Warka caawa - (Caaqil News)- Waxaa muuqata in xiisadda Badda Cas ay sii xoogeysaneyso kaddib markii ururka Xuuthiyiinta Yemen ay mar kale sheegteen inay beegsadeen markabka diyaaradaha xambaara ee USS Harry S. Truman. Weerarkan oo la sheegay inuu dhacay xilli markabkaasi uu ku sugnaa Badda Cas, ayaa noqonaya kii saddexaad ee muddo 24 saac gudahood ah lagu qaado markabkan dagaalka ee Mareykanka.
Afhayeenka Militariga Xuuthiyiinta, General Yahya Saree, ayaa war rasmi ah ku sheegay in Ciidamada Qalabka Sida ee Yemen ay gantaallo la heleen maraakiib dagaal oo Mareykanku leeyahay, oo uu ka mid yahay USS Harry S. Truman. Wuxuu sheegay in weerarkaasi uu jawaab u yahay duqaymaha Mareykanku ka geysanayo gudaha Yemen, kuwaas oo lagu bartilmaameedsanayo xarumaha Xuuthiyiinta iyo goobaha ay ku sugan yihiin hoggaankooda.
Xuuthiyiinta ayaa si cad ugu hanjabay in weeraradooda ay sii socon doonaan inta Mareykanku ku sugan yahay aagga ay ku dhawaaqeen inay difaaci doonaan. General Yahya Saree wuxuu sheegay in weeraradoodu ay noqon doonaan kuwo joogto ah, islamarkaana ay sii xoogeysan doonaan. Wuxuu intaas ku daray in maraakiibta Mareykanka ay la kulmi doonaan dagaal ka adag midka hadda socda haddii ay sii wadaan hawlgalladooda militari ee Yemen.
Ururka Xuuthiyiinta ayaa horey ugu celceliyay in maraakiibta Mareykanka iyo kuwa Israel aysan mari karin biyaha Badda Cas, Gacanka Cadmeed iyo Badda Carabta, inta ay Israel sii wadeyso weerarada ay ka geysaneyso Gaza. Waxay sidoo kale carrabka ku adkeeyeen in ay bartilmaameed u noqon doonaan dhammaan maraakiibta ganacsiga ee kusii jeeda dekedaha Israel, taas oo keentay in shirkado badan ay ka baqaan isticmaalka marinnada biyahaasi.
Hoggaamiyaha Xuuthiyiinta, Abdul-Malik Al Houthi, ayaa mar kale ku celiyay in Yemen aysan aqbaleynin maraakiibta Israel iyo kuwa ganacsiga ee u socda dalkaa, ilaa iyo inta Israel joojinayso xasuuqa ay ka waddo Marinka Gaza. Wuxuu uga digay shirkadaha maraakiibta in ay ka fogaadaan waddooyinka biyahaas, haddii kale ay la kulmi doonaan weeraro ka dhan ah maraakiibtooda.
Tan iyo markii Israel bilowday dagaalka ay ka waddo Gaza, Xuuthiyiinta Yemen waxay si xowli ah u billaabeen weerarro gantaallo iyo diyaarado aan duuliye lahayn ah oo ay ku beegsanayaan maraakiibta ku sugan Badda Cas iyo aagga Gacanka Cadmeed. Weeraradooda ayaa sababay in qaar ka mid ah maraakiibta ganacsiga ay joojiyaan isticmaalka marinnadan muhiimka ah, taasoo saameyn weyn ku yeelatay ganacsiga caalamiga ah.
Dowladda Mareykanka ayaa iyaduna tan iyo bartamihii bishii March qaadayay duqaymo ka dhan ah Xuuthiyiinta, si ay u joojiso weerarada ay ka geysanayaan biyaha caalamiga ah iyo gantaallada ay u dirayaan gudaha Israel. Mareykanku wuxuu sheegay in duqaymahan ay yihiin kuwo lagu difaacayo maraakiibta ganacsiga iyo kuwa dagaalka ee Mareykanka.
Hase yeeshee, weerarrada Mareykanka kuma aysan qasbin Xuuthiyiinta in ay joojiyaan howlgalladooda. Taa beddelkeeda, waxay ku gooddiyeen inay sii wadi doonaan weerarada, iyagoo xusay in dagaalkooda uu salka ku hayo xasuuqa ka socda Gaza iyo cunaqabateynta lagu hayo dadka rayidka ah.
Dhawaan, Madaxweynaha Mareykanka Donald Trump ayaa Xuuthiyiinta ugu baaqay in ay joojiyaan weerarada ay ku hayaan maraakiibta Mareykanka ee mara Badda Cas. Trump wuxuu sheegay in haddii ay sidaa sameeyaan, Mareykankuna uu joojin doono duqaymaha ka dhanka ah Xuuthiyiinta.
Si kastaba ha ahaatee, Xuuthiyiintu uma muuqdaan kuwo dan ka leh baaqa Trump. Waxay si adag u sheegeen in dagaalkoodu uu sii socon doono inta Israel ay dhiigga shacabka Gaza daadineyso, islamarkaana ay caqabad ku tahay in gargaarka la gaarsiiyo dadkaa macluulsan.
Abdul-Malik Al Houthi, hoggaamiyaha Xuuthiyiinta, ayaa Khamiistii la soo dhaafay jeediyay khudbad uu kaga hadlayay xaaladda gobolka. Wuxuu sheegay in Yemen aysan marnaba ka laaban doonin mowqifkeeda, islamarkaana ay sii wadayso weerarada gantaallada, inta ay Israel ka joogi doonto xasuuqa Gaza.
Isagoo ka hadlayay weerarada ay Xuuthiyiintu fuliyeen, Al Houthi wuxuu xusay in gantaalladoodu ay yihiin jawaab cad oo la xiriirta xasuuqa Israel, islamarkaana ay tahay waajib diineed iyo mid qaran in ay difaacaan shacabka Muslimiinta ah ee dhibban.
Wuxuu sheegay in Mareykanka uu si indho la’aan ah u taageerayo Israel, islamarkaana ay tahay in dadka Muslimiinta ah aysan arrintaa ka aamusanayn. Waxa uu ku nuux-nuuxsaday in Yemen ay hormuud ka tahay iska caabbinta siyaasadaha Mareykanka iyo Israel ee gobolka.
Xiisadda ka dhalatay weerarada Xuuthiyiinta waxay horseeday in shirkado badan oo caalami ah ay dib u eegaan isticmaalka marin-biyoodka muhiimka ah ee Badda Cas. Shirkadaha qaarkood ayaa door biday inay maraan waddooyin kale, taasoo keenaysa khasaaro dhaqaale iyo kordhinta waqtiyada safarrada badda.
Waxaa jirta cabsi xooggan oo ah in dagaalka uu sii fido, iyadoo wadamada reer Galbeedka ay ka walaacsan yihiin in xasaradda Badda Cas ay faraha ka baxdo, islamarkaana ay saameyn toos ah ku yeelato ganacsiga caalamiga ah.
Dowladaha reer Galbeedka, gaar ahaan Mareykanka iyo Ingiriiska, ayaa wada qorshe ay ku xoojinayaan amniga maraakiibta maraysa Badda Cas. Waxaa la qorsheynayaa in la kordhiyo maraakiibta dagaalka ee ilaaliya marinnada muhiimka ah, si loo yareeyo khatarta weerarada Xuuthiyiinta.
Si kastaba ha ahaatee, Xuuthiyiinta Yemen ayaa ah urur aan cabsaneynin culeyska militari ee lagu hayo, waxayna horey u muujiyeen inaysan ka laba-labeyn doonin in ay sii wadaan dagaalkooda.
Wuxuu muuqdaa in xiisaddan aysan degi doonin xilli dhow, maadaama labada dhinac ay muujiyeen inaysan diyaar u ahayn tanaasul. Xuuthiyiintu waxay dalbanayaan in Israel ay joojiso dagaalka Gaza, halka Mareykanka uu doonayo in la joojiyo weerarada lagu hayo maraakiibtiisa iyo kuwa ganacsiga caalamiga ah.
Mareykanka iyo xulafadiisu waxay isku dayayaan in ay helaan xal ay ku sugaan amniga biyaha Badda Cas, laakiin Xuuthiyiintu waxay caddeeyeen in aysan marna oggolaan doonin maraakiibta Israel inay maraan biyahaasi, ilaa ay ka dhammaanayso dhibaatada ka jirta Gaza.
Dagaalkan u dhaxeeya Mareykanka iyo Xuuthiyiinta wuxuu noqday mid halis ku ah ganacsiga caalamiga ah, iyadoo shirkado badan ay dareemayaan cabsi ballaaran oo la xiriirta khatarta sii kordheysa ee weerarada.
Dalka Yemen ayaa hadda ah waddanka keliya ee Carbeed ee si ficil ah uga dhiidhiyay xasuuqa Gaza, taasoo xoojisay taageerada ay ka helayaan shacabka Muslimiinta ah ee dunida dacalladeeda ku nool.
Xuuthiyiinta waxay sheegeen in aysan joojin doonin weeraradooda, ilaa ay xaqiijiyaan in Israel ay ka joogsatay weerarada ay ka waddo Gaza, islamarkaana ay oggolaatay in gargaarka bani’aadantinimo la gaarsiiyo dadka ay go’doomiyeen.
0 Comments